تنبيه مهم جدًا #لأصحاب_مشاتل_الفراولة

الحرارة هتعدي 42 درجة، مع "صهد" ورطوبة عالية وشبورة صباحية ورياح سخنة!

________________________________________

يعني إيه الكلام ده؟ إيه اللي ممكن يحصل؟

مع ان الأجواء كانت مناسبة (جداً) لافضل نمو للشتلات طوال شهري مايو ويونيو ( 5 و 6 ) وحتى نص يوليو (7) ، وده والحمد لله فرق كتير مع الشتلات وخلاها قوية وصحية ..

ولكن بسبب ما هو متوقع من ارتفاعات في الحرارة

الشتلات متوقع انها هتتأثر واحتمال تتعب وتبين عليها علامات الإجهاد:

** الورق يلف لاعلى

** المدادات (الشتلات الجديدة) مش هتنمو كويس

** الأرواق مش هيعمل بناء ضوئي زي الطبيعي بسبب التفاف الأوراق لاعلى.

البخر نتح هيزيد كتير... والنبات مش هيلحق يمتص، فهتبدأ تبان أعراض نقص عناصر، خاصة:

** البوتاسيوم → الورق يصفر وينشف من الأطراف

** الحديد → الورق يشحب ويبقى لونه باهت

** المنجنيز → الورق بيصفر عدا العروق

** الماغنسيوم → اصفرار الأوراق ما بين العروق

** الكالسيوم → التفاف الأوراق لاعلى

**البورون → قصر طول المدادات

الجو ده بيحبّه الفطر وبيساعد على انتشار أمراض زي:

** الأنثراكنوز

** أعفان الجذور

** امراض الريزوكتونيا والفيتفثورا

كمان الحشرات هتشتغل، خصوصًا ديدان الأوراق والدودة الخضرا ودودة ورق القطن. والتربس بعد انكسار الموجة

________________________________________

طب نعمل إيه؟ نتصرف إزاي؟

أول حاجة الري:

** ما تزودش الميّه أكتر من اللازم خصوصًا في الأماكن الواطية.

** الرشاشات تشتغل 3 مرات في اليوم:

9 صباحًا - 11 صباحًا - 3 عصرًا

كل مرة 15 لـ 20 دقيقة بس ...

بلاش ري في عز الظهر

ثاني حاجة التغذية والمكافحة:

حط مع الري بالتنقيط: فولفيك + نترات ماغنسيوم عشان تقاوم الإجهاد.

ابعد خالص عن أي سماد آزوتي (سواء لوحده أو NPK).

رش أحماض أمينية + طحالب + عناصر صغرى (حديد – زنك – منجنيز).

ضروري جدًا حقن وقائي ضد أعفان الجذور بـ: فلودوكسونيل أو دايفينوكونازول او ثيوفينات مثيل + ميتالكسيل.

لو لقيت 3 فراشات حرشفية الأجنحة في المصايد:

رش فورًا بـ أمامكتين بنزوات + مانع انسلاخ + لمبادا 10%

الرش يكون قبل المغرب على طول.

للوقاية من أمراض الحرارة والرطوبة: رش كل 10 أيام إلى أسبوعين بـ أزوكسي ستروبين + مانكوزيب.

وما ننساش كمان المشتل اللي قفل أو قرب يقفل (يعني الشتلات خلاص خلصت نموها):

** لازم تشتغل معاها دلوقتي على تقويتها قبل ما تطلع الأرض الجديدة... وده يحصل كالتالي:

رش أو حقن بوتاسيومات + كالسيوم بورون

ده مهم جدًا عشان يقوي الأنسجة ويزود صلابة الشتلة ويحافظ على تماسكها.

كمان الكالسيوم بورون بيساعد في تقليل الإجهاد وبيجهز الشتلة للزرع في الأرض المستديمة.

متنساش تحمي الشتلات من الأمراض اللي بتحب الورق "ضعيف السكّر" زي:

• الأنثراكنوز

• الألترناريا

• التبقعات الفطرية

الأمراض دي بتشتغل لما السكر في الورق يقل بسبب الحرارة والضعف، فـ لازم يكون في رش وقائي منتظم بمبيدات فطرية مناسبة.

________________________________________

يعني حتى لو قفلت المشتل... لسه فيه شغل مهم علشان الشتلة تكمل قوتها وما يحصلهاش انتكاسة أول ما تتنقل.

فاكر: الشتلة القوية = بداية موسم ناجحة

والشتلة الضعيفة = مشاكل من أول لحظة في الأرض.

________________________________________

تحذير شديد:

أوعى تبدأ تزرع بدري ( ما قبل أول سبتمبر ) لمجرد إن الشتلات شكلها كويس أو "باينة جاهزة"...

اللي هيزرع بدري مش كويس لان متوقع يكون صيف متأخر ... الشتلة هتتعب، وتموت أو تطلع ضعيفة، واللي كان هيبقى موسم ناجح، هيبدأ بخسارة من أول يوم!

________________________________________

#الزتونة:

في الزراعة، "الفرصة الصح" أهم من "السرعة"...

استنّى التوقيت المظبوط، وخد بالأسباب...

وإوعى تستعجل وتقول الشتلة كويسة، لأن الجو مش مضمون !

اللي هيصبر هيكسب، واللي هيستعجل هيخسر من بدري!

شارك المنشور مع كل صاحب مشتل أو مزارع فراولة... الكلمة دلوقتي ممكن تحمي موسم كامل!

مع تحيات

أ.د/ محمد علي فهيم

23 يوليو 2025